بقلم وفاء يونس
طبعا اختلاف الرأى لا يفسد للود قضية
وكل واحد فينا بيبقا له قناعاته الشخصية ومهما اللى قدامك حاول يفهمك او يوضحلك ان وجهة نظرك غلط انت ما بتقتنعش وكمان بنجرى على اسهل حاجة وهى الاتهامات والتصنيف والتحزيب واحيان اخرى السب والقذف
بس دة غالبا مش هيحصل معايا لان الكل عارفنى وعارف اسلوبى وعارف طريقتى وازاى انا بجبر اللى قدامى على احترامى عمرى ما غلطت فى حد وماسمحش لحد يغلط او حتى يفكر يتطاول معلش المقدمة طويلة شوية لكن الشىء لزوم الشىء واللى اوله شرط اخره نور واللى هيتناقش فى الموضوع يتناقش بهدووووووء
اولا انا الكل عارف عنى انى بتبنى القضايا الانسانية ومابعرفش ازوء الكلام ولا بعرف اقف مع وزير ولا رئيس ودايما وقفتى مع الفقرا والغلابة اللى انا منهم تمام
من اول يوم ظهر المدعو ( محمد على ) على السوشيال ميديا وانا بتفرج على فديوهاته فى صمت والكل كان عمال يسألنى فين تعليقك على الاحداث وكنت بقول بجمع بس المعلومات وبظبط دماغى لانى ماتعودتش اكتب عن حاجة الا لما تكون الصورة مكتملة امامى وعشان لا اظلم ولا اتظلم
الاهم فضلت اعيد وازيد فى الفديوهات واتفرج على رد الفعل السريع للناس وطبعا عندهم مليون حق ومليون سبب
الغلاء والوعود اللى خدناها مزارع سمك فشنك والسمك مولع ووحدات سكنية للشباب وتدفع وتستنى بالسنة واتنين وفى الاخر يرجعولك فلوسك اسعار فى السما وتجار جبابرة والناس فعلا اطحنت من وكسة القروض وتعويم الزفت الجنية ومافيش اى انجازات ملموسة للشعب ماحدش يقولى طرق وكبارى وبنية تحتية الفقير مايعرفش الكلام دا الفقير عايز الدعم ير جع الفقير عيالة بتموت من الجوع قدامة ومش هيقعد يستنى اما البلد تعمر ومعرفش ايه
مالناش فيه انت جنابك ياريس تشغل الشئون الاجتماعية وتنزل ناس تعمل دراسة ميدانية وتاخد من اللى يملك ويملك وسيبك بقا من الفقير اللى اتنحل وبر امه هى دى السياسة وهى دى مطالب الناس وانا معاهم
لحد هنااا الكلام سليم …..
طيب ما الهيرو اللى اسمه محمد على طلع ولعب على مشاعر الناس بالكلام دا وعشان كدا الناس عملت منه بطل قومى
والناس من تعبها وارفها استنجدوا به وقالوا اهو واحد جرىء يعبر عن رأينا ويمكن صوتنا يوصل من خلاله
حلو اوى طبعا وانا كنت هأيده واعمله بوست واقول محمد على يمثلنى وبتاع
لكن الحقيقة غير كدا تماما
كلنا عارفين وواثقين ان الفساد موجود فى كل المؤسسات وبأشكال مختلفة وبدرجات مختلفة من اول المؤسسات الحكومية لغاية المؤسسات الدينية وكلنا سمعنا وشفنا الازهر والكنيسة الكاثوليكية ومش فى مصر وبس دا فى كل دول العالم وشىء طبيعى ان مؤسسة الجيش يكون فيها فساد
ومن ضمن فسادها شركات المقاولات اللى بتاخد امر مباشر وتشتغل وبكدا ما بيبقاش فى فرصة لباقى الكيانات للاستفادة من العمل فى مجال المقاولات واشياء اخرى كثيرة
الحكاية بقا ان المدعو محمد على كان هايص فى الفته والفساد دا وبياخد اغلب الشغل بالامر المباشر لحد ما عمل شركة مقاولات من اكبر الشركات فى مصر وكان بيمشى حالة بالرشاوى والمسخرة وعمل مليارات
وطبعا الفساد لا يستمر واكيد هيجى يوم والموضوع يتكشف لان ربنا اسمه العدل ودا اللى تم بالفعل
اختلفوا الحرامية مع بعص فظهرت البضاعة ويا تجيبوا فلوسى يا افضحكوا وعليا وعلى اعدائى
الراجل دا اشتغل ١٥ سنه واكثر ولم مليارات من الشعب المصرى اللى بيتاجر به وبيقول فلوس الشعب لازم ترجعله
طيب ياعم الحج ماكان اولى انك ترجع المليارات اللى معاك ومع السيد الوالد طالما قلبك علينا
انت طالع بكل بجاحة تذل الناس وتقولهم انا عندى خمس عيال وامهم وعندى عربيات فيرارى ومعيشهم فى قصر فى اسبانيا عشان دا اللى قدرت اطلع به من البلد وكمان عشان عيالى مايحسوش ان مستواهم اقل
والله العظيم انا لولا الملامة كنت قلتلك كلمة عيب يا راجل يلى ما تختشيش ولا تعرف ربنا وبتلعب بمشاعر شعب طافح الدم عشان يأكل عياله عيش حاف
الباشا اللى انتم عاملينه بطل شعبى دا لو كان الجيش ما حجزش له فلوسه وبلغ البنوك انه وقف شغل معاه
البنوك اللى اخد منها ملايبن قروض باسم الجيش عشان يصرف على افلام فاشلة ويجامل ممثل ب بفيلات بملاليين
ويعيش حياة السكر والعربدة بفلوسنا
كان زمانة دلوقتى عايش بكل فجور وبكل انانية وبيكمل فى الحرام عاااادى طالما الدنيا ماشية معاه
لكن لما الدنيا وقفت معاه اشتغل على الشعب الغلبان
واستغلهم لترويج افكاره وهدم مؤسساته
والله مش هقدر الوم واعتب على الناس الشقيانة
بس ياريت نفكر شويه ومانخليش حد يستغلنا
انا حاولت اوضح الصورة ومش عايزة ادخل فى تفاصيل اكثر من كدا لانى سالت وعرفت ليه الدولة مش عايزة ترد عليه وعرفت حاجات كتير لكن الكلام مالوش فايدة
اللى عايزة اوصله لكم ان المدعو محمد على لا يمثلنى ولا يمثل شعب مصر اللى ما بيعرفش يعيش بالحرام
المقال دا على مسؤليتى الشخصية
ومش منقول من اى مكان