الرئيسية / المرأة والطفل / 10 عادات بتعمليهم في الشاور بتضر شعرك وبشرتك لازم تبطليهم

10 عادات بتعمليهم في الشاور بتضر شعرك وبشرتك لازم تبطليهم

مي النشار

من الطبيعي ان الشاور جزء مهم في روتينا اليومي, وهو مش بس حاجة صحية لكن كمان يعتبر وسيلة ممكن تساعدنا على الاسترخاء والتخلص من القلق والاجهاد اللي بيحصلنا طول اليوم، لكن عشان تستمتعي بيه بشكل صح يبقى لازم تتخلصي من كل العادات السيئة اللي ممكن تكوني بتعمليها وانتي مش واخدة بالك او متعرفيش انها غلط, والنهاردة من خلال موضوعنا هنقولكم علي 10 عادات شاور سيئة لازم تبطليهم.

1- بتنسي تعملي سكراب للقدمين:

ممكن كتير يفكر انها مهمة او روتين اسبوعي, لكن الصح انها المفروض تتعمل يوميا, ومعهد الصحة الوقائية صرح ان المفروض القدمين يتغسلوا بشكل يومي كويس بنوع صابون خفيف عشان تمنعي اي عدوى او فطريات او بكتيريا للقدمين, واتأكدي انك تنشفيهم كويس جدا بعد التنضيف.

2- تعليق الليفة في الحمام:

تقريبا العادة كلنا بنعملها وبنشوف انه من الطبيعي نعلقها في الحمام بعد الشاور, لكن دكاترة الجلدية بينصحوا انك تتجنبي العادة دي, لان الليفة بعد الشاور بتتراكم عليها الخلايا الميتة, وده بيخليها بيئة مثالية لتكاثر البكتيريا, عشان كده اللي المفروض يتعمل انك بعد الشاور تنضفي الليفة كويس جدا, وتسيبيها تنشف في الهوا في مكان خالي من الجراثيم.

3- بتفركي بشرتك بالفوطة اوي:

استخدام الفوطة بقوة على البشرة ممكن يتسبب في تلفها وخصوصا لو بشرتك حساسة، فتوقعي ان بشرتك ممكن تبقى جافة جدا وحساسة زيادة لو فركتيها بالفوطة بعنف اوي، وافضل طريقة لاستخدام الفوطة هي انك تطبطبي على البشرة او تنشفي بشرتك بطريقة الضغط من غير فرك وتكون الفوطة ناعمة.

4- استخدام الشامبو بشكل يومي:

غسل الشعر بشكل يومي ممكن يتسبب في جفافه وتلفه لانه بيمنع انتاج الزيوت الطبيعية في فروة الراس اللي تعتبر مهمة في تغذية الشعر، عشان كده الافضل للبنات اللي شعرهم كثافته عادية وناعم يغسلوه مرتين في الاسبوع, واللي شعرهم كثيف ومجعد يغسلوا الشعر مرة واحدة بس في الاسبوع.

5- عدم استخدم مرطب بعد الشاور:

الترطيب بعد الشاور مهم جدا, لان لو اهملتي الخطوة دي ده ممكن يأدي لجفاف البشرة, عشان كده الخبراء بينصحوا بعد الشاور على طول تنشفي البشرة بطريقة الطبطبة زي ما قولنا، وتحطي المرطب عشان تحافظي على رطوبة ونعومة البشرة.

6- بتنسي تاخدي شاور بعد التمارين الرياضية:

ممكن تفكري ان الشاور بعد التمارين الرياضية وظيفته بس التخلص من ريحة العرق اللي بعد مجهود التمارين، لكن الحقيقة ان وظيفته اكتر من كده، لان العرق ممكن يسمح للبكتيريا انها تدخل في المسام وتسبب لك مشاكل وطفح جلدي ، عشان كده الشاور مهم جدا وضروري بعد التمارين.

7- بتاخدي شاور وقت طويل:

اكيد كلنا بنلاحظ لما ناخد شاور وقت طويل بتلاقي جلدك حصل فيه تجاعيد لما بتفضلي وقت طويل تحت المياة، ودي علامة مش كويسة للبشرة لانه الشاور لوقت طويل ممكن يسحب الرطوبة من بشرتك، وده ممكن يسبب الجفاف والحكة، عشان كده دكاترة الامراض الجلدية بينصحوا ان الوقت المثالي للشاور ميزدش عن 5 – 10 دقايق.

8- بتحطي البلسم على فروة الراس:

معظم البنات او اللي شعرهم طويل بشكل خاص بيحطوا البلسم على فروة الراس وده ممكن يكون مضر للشعر، لانه ده ممكن يزود انتاج الزيوت في فروة الراس وده هيخلي شعرك يبقى شكله مجهد وباهت ، عشان كده البلسم يتحط على اطراف الشعر بس او على 3/4 الشعر من تحت ،لان ده الجزء اللي بيكون محتاج عناية وترطيب اكتر.

9- مش بتستخدمي مياة باردة بعد المياة السخنة:

الخبراء بينصحوا ان بعد الشاور بالمياة السخنة، المفروض تاخدي شاور اخير بمياة باردة لمدة 30 ثانية، لان ده بيساعد على تقليل التوتر والاجهاد، بيعزز المناعة، ويعتبر مضاد للاكتئاب،كمان بيحسن قدرة الجسم على حرق الدهون.

10- بتلفي شعرك بالفوطة:

عادة تانية ممكن تكون مضرة وهي لف الشعر بالفوطة، زيادة الضغط بالفوطة على الشعر ممكن يسبب ضرر للجذور ويضعف الشعر، وافضل طريقة عشان تنشفي شعرك انك تضغطي عليه بالراحة بالفوطة من غير فرك، او تعصريه بالراحة بالفوطة، الطريقة دي هتقلل من تشابك الشعر.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *